BASTAUMEDIA

Мәжілістің Аграрлық мәселелер жөніндегі комитетінде «Топырақты қорғау туралы» депутаттық заң жобасы және оған ілеспе түзетулер таныстырылды, деп хабарлайды ҚазАқпаратқа сілтеме жасаған Bastaumedia.kz ақпараттық порталы.

ҚР АШМ Жерге орналастыру жұмыстары жөніндегі мемлекеттік институтының мәліметінше, бүгінде елімізде 29,9 миллион гектар жер тозған. Ықтимал топырақ құнарлылығы 17%-ға төмендеген, ал суармалы жерлердегі сортаңды жерлер 35-37%-ға артқан. Соның салдарынан ауыл шаруашылығы өнімін өндіру азайған.

«Өткен жылы «Жайылымдар туралы» заңға жайылымдардың тозу процестерінің алдын алуға, олардың жағдайын түбегейлі жақсартуға бағытталған, топырақты қорғау мәселелеріне және жасыл экономика негіздеріне тікелей қатысты нормалар енгізілді. Дегенмен, қазір егістік алқаптарының тозуы, олардың қарашірігінің азаюы қайтымсыз қарқын алуда», − деді Мәжіліс депутаты, жұмыс тобының жетекшісі Нұржан Әшімбетов.

Айта кетерлігі, Жер және Экологиялық кодекстерде топырақты қорғау саласындағы қатынастарды реттейтін нормалар жалпы сипатта болады, онда топырақты қорғаудың құқықтық тетіктері мен шаралары жоқ.

«Қолданыстағы Жер кодексінде топырақ болып саналатын қоршаған орта объектілеріне (6-баптың 2-тармағы) қатысты арнайы заңнамалар қабылдау көзделген.Топырақты қорғауды құқықтық реттеу мен басқаруға кешенді көзқарастың болмауы топырақтың одан әрі деградациялану, биологиялық өнімділіктің төмендеуі және олардың экономикалық және экологиялық міндеттерін орындамау қаупін тудырады. Осыған байланысты жоғарыда аталған заң жобалары әзірленді», − деп түсіндірді Н.Әшімбетов.

Негізгі заң жобасының ережелері топырақ ресурстарын ұтымды пайдалану, оларды жасылдандыру, жердің нысаналы мақсаты мен топырақ қасиеттеріне байланысты құқықтық режимге сараланған көзқарас, минералды тыңайтқыштар мен пестицидтерді пайдалануды барынша азайту, сондай-ақ топырақты экожүйенің бөлігі ретінде тану қағидаттарына негізделген.

«Көкарал бөгетін сақтау және Сырдария өзенінің сағаларын қалпына келтіру» жобасы аяқталуға жақын. Бұл туралы ҚР Су ресурстары және ирригация министрлігінің ресми өкілі Мөлдір Әбдуалиева айтты, деп хабарлайды ҚазАқпаратқа сілтеме жасаған Bastaumedia.kz ақпараттық порталы.

«Көкарал бөгетін сақтау және Сырдария өзенінің сағаларын қалпына келтіру» жобасы аяқталуға жақын. Министрлік жыл соңына дейін Солтүстік Аралды Үлкен Арал теңізінен бөліп тұрған Көкарал бөгетін реконструкциялау жұмысын аяқтауды жоспарлап отыр. Бұл Солтүстік Аралды сақтауға, судың тұздылығын одан әрі азайтуға және аймақтағы экологиялық жағдайды жақсартуға көмектеседі», — деді ол ОКҚ алаңында.

Сондай-ақ ресми өкіл министрлік Дүниежүзілік банкпен бірге 39 жобаны қамтитын «Солтүстік Арал теңізін сақтау» жобасының екінші кезеңін әзірлегенін айтты.

«Бұл жобаның қандай пайдасы болады? Бұл 2000 адамды тұрақты жұмыспен қамтамасыз етуге, Қызылорда облысының ауыл шаруашылығы мен балық аулау кәсібін дамытуға, қосымша жұмыс орындарын ашуға, өңірдегі экономикалық және әлеуметтік жағдайды жақсартуға мүмкіндік береді», — деді Мөлдір Әбдуалиева.

Бұған дейін ол Солтүстік Аралға наурыздың соңына дейін 1,6 млрд текше метр су жіберілетінін айтты.

Қазақстан қор биржасындағы (KASE) сауда-саттық қорытындысы бойынша, 1 доллардың теңгеге шаққандағы бағамы төмендеді, деп хабарлайды ҚазАқпаратқа сілтеме жасаған Bastaumedia.kz ақпараттық порталы.

KASE қор нарығындағы күндізгі сауда қорытындысы бойынша, доллар бағамы 3,95 теңгеге арзандады.

Бір АҚШ долларының орташа бағамы – 497,88 теңге.

Kurs.kz мәліметінше, қазіргі уақытта Алматының ақша айырбастау пункттерінде доллар 502 теңгеден сатылып жатыр, сатып алу бағамы — 498 теңге. Еуро 518 — 523 теңге аралығында құбылып тұр.

Ал, Астана қаласы бойынша долларды сату бағамы — 504 теңге, сатып алу құны — 498 теңге. Еуро 524 теңгеден сатылып, 517 теңгеден сатып алынады.

Дәл қазіргі уақытта ақша айырбастау орындарында Ресей валютасы 5,34 — 5,48 аралығында саудаланып жатыр.

Ұлттық банктің 13 ақпанға ұсынған ресми бағамы — бір долларға 501,31 теңге. Ресей рублінің орташа сараланған құны — 5,33 теңге. Еуро — 520,11.

Осыған дейін Қазақстан қаржыгерлер қауымдастығы 2025 жылы доллар 545 теңгеге дейін баруы мүмкін екенін айтты.

Сондай-ақ Ұлттық банк валюта айырбастаудың жаңа ережесін бекітетінін мәлімдеді.

Қазақстандық экономистер теңгенің нығаюына мүмкіндік бар екенін айтты.

Астана вокзалында орын алған төтенше оқиғаға қатысты ТЖМ хабарлама таратты, деп хабарлайды ҚазАқпаратқа сілтеме жасаған Bastaumedia.kz ақпараттық порталы.

Елордалық Полиция департаментінің орталық жедел басқармасының дерегінше, Сарыарқа ауданындағы Гёте көшесінде жарылыс болған.

ҚТЖ бөлімшесі кезекшісінің мәліметінше, 12-ші сұрыптау жолында платформадағы контейнерде дүмпу орын алды.

Ал ТЖМ оқиға орнына дереу құтқарушылар жеткенін мәлімдеді.

«Өрт болған жоқ. Зардап шеккендер де байқалмады. Оқиға нәтижесінде бір адам жарықшақтан қолын аздап кесіп алған. Жедел медициналық жәрдем бригадасы оқиға орнында көмек көрсетті, ауруханаға жатқызу қажеті болмады», — делінген ведомство дерегінде.

Оқиғаның себептері мен мән-жайлары нақтылануда.