BASTAUMEDIA

Ұлытау облысындағы Кенгір су қоймасы «Kazakhmys Distribution» ЖШС балансында болған, деп хабаралайды Azattyq Rýhy-на сілтеме жасаған Bastaumedia.kz ақпараттық порталы

«Кеңгір су қоймасы — энергетика және ирригация саласында судың басты реттеушісі. Ол 1952 жылы салынған (319 миллион шаршы метр) және оның гидротехникалық құрылыстары стратегиялық объектілер катарында, демек мемлекет меншігінде болуы тиіс», — деп жазды прокуратура.

Су қоймасын қайтару үшін сыйға тарту шарты жасалып, объектіні беру актісіне қол қойылған.

Енді уәкілетті органдар оларды жаңғырту жөнінде одан әрі шаралар қабылдау мақсатында су қоймасы мен оның гидротехникалық құрылыстарына көп факторлы зерттеу жұмыстарын жүргізу қажет.

Ұлттық экономика министрінің орынбасары Бауыржан Омарбеков ауылды дамытуға арналған жеңілдетілген несиелерді алуға хақылы ауылдардың санын көбейту жоспарланып отырғанын айтты, деп хабарлайды ҚазАқпаратқа сілтеме жасаған Bastaumedia.kz ақпараттық порталы.

«Ауыл аманаты» бағдарламасы бойынша 2025 жылы 50 млрд теңге бөлініп, жобалар іске асырылады. Бұған дейін осы бағдарламаның әкімшісі Ауыл шаруашылығы министрлігі болса, Үкімет деңгейінде оны Ұлттық экономика министрлігіне беру туралы шешім қабылданды, — деді ол Мәжілістегі дөңгелек үстелде.

Вице-министр Президенттің тапсырмасы бойынша «Ауыл — ел бесігі» және «Ауыл аманаты» бағдарламаларын біріктірілетін еске салды.

«Ауыл — ел бесігі» бағдарламасында іріктелген 3500 ауылмен ғана жұмыс істеген едік. Бұдан былай басқа ауылдарға несие бермейміз деген позицияны ұстана алмаймыз. Өйткені қалған 2800-ге жуық ауылға да қолдау керек. Дегенмен басым бағыт даму әлеуеті жоғары елді мекендерде болады. Қазіргі 3500 ауылдың тізбесін қайта қарап шығуымыз керек шығар. Бұған дейін халық санына мән беріп отырсақ, енді экономикалық әлеуетіне көбірек назар аударамыз. Яғни, бұрын 3500 ауыл болса, енді бәлкім 4000-ға жеткізетін шығармыз», — деді Бауыржан Омарбеков.

Маңғыстауда басқарма басшысы прокурордың талаптарын орындамағаны үшін әкімшілік жауаптылыққа тартылды, деп хабарлайды ҚазАқпаратқа сілтеме жасаған Bastaumedia.kz ақпараттық порталы.

Прокуратурамен микроқаржы ұйымдарының қызметінде заңдылықтың жай-күйін талдау шеңберінде ҚР Қаржы нарығын реттеу және дамыту агенттігінің Ақтау қаласындағы өңірлік өкілдер басқармасына қажетті мәліметтерді ұсыну туралы ресми түрде талап жіберілді.

«Прокуратура туралы» Конституциялық заңмен белгіленген мерзімдерге қарамастан, Өңірлік өкілдер басқармасымен прокуратураның талабы орындалмай, белгіленген мерзімде ақпарат ұсынылмады. Салдарынан басқарма басшысына қатысты ӘҚБтК 665-бабының 2-бөлігі бойынша әкімшілік іс қозғалды. Сот лауазымды тұлғаны құқық бұзушылық үшін кінәлі деп танып, 50 АЕК көлемінде айыппұл салды», — делінген хабарламада.

Прокуратура, прокурордың талаптары мен сұрау салулары жеке және заңды тұлғалардың, оның ішінде мемлекеттік органдардың, мекемелердің, меншік нысандарына қарамастан ұйымдардың, олардың лауазымды адамдарының орындауы үшін міндетті екенін атап өтеді.

Бұдан бұрын Прокуратура тексерісінен кейін Ақсуда пәтер жалдау ақысы арзандағанын жаздық.

Қазақстанда ет бағасының күрт өсуіне негіз жоқ. Бұл туралы ҚР Ауыл шаруашылығы вице-министрі Ермек Кенжеханұлы айтты, деп хабарлайды ҚазАқпаратқа сілтеме жасаған Bastaumedia.kz ақпараттық порталы.

Вице-министр былтырдың қорытындысы бойынша 1,1 млн тоннадан астам сиыр еті мен қой еті өндірілгенін, бұл көрсеткіш ел ішіндегі сұранысты толық өтейтінін атап өтті.

«2024 жылдың қорытындысына қарасақ, өндіру көлемі шамамен 4 пайызға, оның ішінде сиыр еті 2 пайыздан астам деңгейге өсті. Бұл бағыттағы іс-шаралар халықтың етке деген сұранысын толық қанағаттандыруға мүмкіндік береді, сондықтан ет бағасының өсуіне негіз жоқ», — деді Е. Кенжеханұлы Сенаттың жалпы отырысынан кейін тілшілер сұрағына жауап бере отырып.

Оның айтуынша, ет бағасының көтерілуіне Өзбекстан жағынан болған жоғары сұраныс әсер еткен.

«Бірақ соңғы аптада байқағанымыздай, баға тұрақтанды және қазір өсімнің басқа факторларын көріп тұрғанымыз жоқ», — деді вице-министр.

Сонымен қатар ол қазіргі кезде мал шаруашылығымен айналысатын фермерлерге 5 пайыздық мөлшерлемемен жеңілдетілген қаржыландыруды бөлу қарастырылып жатқанын атап өтті.

«Бұл қадамдар елімізде ет өндіруді одан әрі ынталандырады. Қазір сиыр етінің бағасы келісіне шамамен 2700-3000 теңгені құрап тұр», — деді Ермек Кенжеханұлы.

Бұған дейін хабарланғандай, вице-министр елімізде сәбіздің жаппай бүлінуі деректері анықталмағанын мәлім етті.

Мәжілісте шекаралық елді мекендердің мәселесі талқыланып жатыр, деп хабарлайды ҚазАқпаратқа сілтеме жасаған Bastaumedia.kz ақпараттық порталы.

Бірінші болып баяндама жасаған Мәжіліс депутаты Жигули Дайрабаев дөңгелек үстелген қатысушыларға ауыл халқының жылдан жылға азайып бара жатқанына назар аударуды сұрады.

«Бүгінгі күнде елімізде 6208 ауыл бар, ал 2023 жылы 6286 ауыл болды. Сонда тек 2 жылдың ішінде 80 ауыл жойылды. Күні кеше ғана Мемлекет басшысы Үкіметтің кеңейтілген отырысындағы сөзінде: ауылдық аймақтарды жан-жақты дамытуға арналған мемлекеттік қолдау шараларының бәрін бір бағдарламаға біріктіру қажеттігін баса айтқаны баршаңызға мәлім. Сондықтан осы мәселені талқылап, ауылдарды соның ішінде шекара маңындағы ауылдарды дамыту бойынша нақты шешімдерге келген жөн», — деді ол.

Ал Ұлттық экономика министрлігінің мәліметі бойынша, кейінгі он жылда Қазақстан картасынан 572 ауыл жойылған.