BASTAUMEDIA

Қаржы вице-министрі Дәурен Темірбеков Өңірлік кәсіпкерлер палатасының алаңында Ақмола облысының бизнес-қоғамдастық өкілдерімен кездесті. Жиында салық реформалары, оның ішінде ҚҚС мөлшерлемесін арттыру мәселесі талқыланды, — деп хабарлайды ҚазАқпаратқа сілтеме жасаған Bastaumedia.kz ақпараттық порталы.

Еліміздің президенті Қасым-Жомарт Тоқаев биылғы 7 ақпанда Астанада бизнес өкілдерімен өткен кездесуде Үкіметке ҚҚС мөлшерлемесі бойынша мәселені қосымша пысықтауды тапсырған болатын. Осыған байланысты Премьер-министр Олжас Бектеновтің тапсырмасы бойынша Үкімет мүшелері «Атамекен» ҰКП өкілдерімен бірлесіп жергілікті жерлерде кәсіпкерлік қоғамдастықпен салық саясаты мәселелерін талқылау мақсатында өңірлерге барды.

Дәурен Темірбеков ҚҚС сараланған мөлшерлемелері бойынша Үкіметтің ұсыныстарын жеткізді. Қосылған құн салығының жалпы мөлшерлемесін 16% деңгейінде белгілеу ұсынылуда, ал ауыл шаруашылығы өнімдерін өндірушілерді салықтан толығымен босату жоспарланып отыр. Бірқатар сала үшін 10% аралық мөлшерлеме енгізіледі. Осылайша, Үкімет ұсынған ҚҚС мөлшерлемесін саралау: 16%, 10%, 0%, салықтан босатуды қамтиды.

«ҚҚС өсімі үй маңындағы дүкендерге, мейрамханаларға, сұлулық салондарына және басқа да бөлшек сауда орындарына әсер етпейді», — деп түсіндірді ҚР ҰЭМ салық және кеден саясаты департаментінің директоры Ерлан Сағынаев.

Кездесу барысында салалық қауымдастық өкілдері салық заңнамасына ұсынылатын өзгерістерге қатысты пікірін білдірді.

«Салықты көтеруден басқа, бюджет шығыстарының құрылымын сыни тұрғыдан қайта қарау маңызды. Өткен жылы енгізілген қатаң бюджеттік ережелердің сақталуына бақылауды күшейту қажет, ел экономикасының ішінде резервтерді іздеу қажет. Еңбекақы төлеу қорына салық жүктемесінің 10%-ға төмендеуі ҚҚС мөлшерлемесін көтеру есебінен өтемақымен қатар жүрмеуі тиіс, ол дербес салық реформасы болуы керек», — деп есептейді Ақмола облысы Туристік қауымдастығының басшысы, туризм және экология салалық кеңесінің төрағасы Қайрат Сұлтанов.

Шағын бизнес субъектілері атынан «С. А. Ахмадиев» ЖК басшысы Сәдібек Ахмадиев сөз сөйлеп, тіркеу кезінде ҚҚС-ты 50 мың АЕК-ке дейін ұлғайтуды қарастыруды ұсынды.

Ақмола облысы Кәсіпкерлер палатасының директоры Ерқанат Мұсылманбек қосылған құн салығында мөлшелме мен шекті тіркеу мәселесі ақылға қонымды түрде қабылдануы тиіс екенін айтты.

«Ақмола бизнес-қоғамдастығының пікірі ескеріледі деп үміттенеміз, біз әріптестеріміздің барлық ұсынысын ҰКП Орталық аппараты арқылы қаржы министрлігіне жазбаша түрде жолдаймыз. ҚҚС мөлшерлемесі мен шекті тіркеу мәселесі білікті сарапшылардың, кәсіпкерлер мен депутаттардың пікірін ескере отырып, ақылға қонымды түрде қабылдануы керек», — деп толықтырды ол.
Өз кезегінде вице-министр Дәурен Темірбеков келіп түскен барлық ұсыныс мұқият қаралып, талданып, әрі қарайғы жұмыста ескерілетінін атап өтті.

https://kaz.inform.kz/news/akmola-kaspkerler-karzhi-vitse-ministrmen-kezdesude-salik-reformalarin-talkiladi-2ed42d/

Атырау облысында былтырғыдай су тасқыны бола ма? Облыс әкімі Серік Шәпкеновтің айтуынша, алдына ала бағалауға сәйкес бүгінгі ахуал былтырғы сценарий бойынша өрбіп отыр, хабарлайды ҚазАқпаратқа сілтеме жасаған Bastaumedia.kz ақпараттық порталы.

Су тасқынының алдын алу үшін бұған дейін соғылған бөгеттер реконструкцияланып, қалыпқа келтіріліп жатыр. Оған қажетті қаржы қарастырылған. Материалдық-техникалық резервтер толық жинақталған.

«Жол инфрақұрылымын қалпына келтіру аясында Үкіметтің резерв қаржысы мен жергілікті бюджет есебінен 30 шақырым жол жөнделіп, 4 көпір қалпына келтірілді. Жол бойында 13 мал өткелі салынып, бұрын су шайып кеткен 49 учаскеге су өткізу құбырлары қондырылды», — дейді Серік Шәпкенов.

Әкімнің айтуына қарағанда, Атырау облысындағы су тасқынына қарсы шаралар аясында Жылыой ауданындағы Жем өзені мен Құрсай арнасының түбін тереңдету жұмыстары жүріп жатыр. Жобаға сәйкес 95 шақырым түптің 80,3 шақырымы тереңдетілген.

«Жоспарланған 61 шақырым бөгеттің 29 шақырымы соғылды. Қызылқоға ауданының 9 ауылдық округі мен 5 елді мекенінде 41,9 шақырым бөгетті нығайту қолға алынды. Индер ауданында қолданыстағы 34,5 шақырымдық бөгеттің қорғаныс құрылыстары күшейтілді. Махамбет ауданында 105 шақырым бөгет салынды. Биыл қосымша 29,9 шақырым бөгет нығайтылып, жаңадан 12,4 шақырым бөгет тұрғызылады», — деп мәлім етті Серік Шәпкенов.

Еске сала кетелік, бұған дейін Атыраудағы Зарослый және Гогольский каналдарын тереңдету қашан аяқталатынын жазған едік.

Ақтөбе облысы Шалқар ауданындағы №6 орта мектептің жылу жүйесі істен шығып, екі күн бойы оқушылар онлайн білім алды, деп хабарлайды ҚазАқпаратқа сілтеме жасаған Bastaumedia.kz ақпараттық порталы.

Ақтөбе облысы Шалқар қаласындағы № 6 орта мектепте қазір жылу жүйесі уақытша қалпына келтірілді. Ал жөндеу жұмысы көктемгі демалыста жүргізіледі.

«№ 6 орта мектептегі жылыту жүйесі аудан әкімінің, мәслихаттың, білім бөлімінің бақылауында тұр. 3-4 ақпан күндері мұнда жылу жүйесінен ақау шығып, балалар сол күндері онлайн білім алды. Мектеп жертөлесіндегі жылу құбыры тозып, істен шыққан. Жұмыс тобы оны қалпына келтіріп қойды. Ал жылу жүйесін толық ауыстыру жұмысы көктемгі демалыс кезінде жүргізіледі. Қазіргі кезде қажетті құрал-жабдықтың бәрі сатып алынды. Мемлекеттік сатып алу жүргізілді, материалдар қоймада сақтаулы тұр. Балалар мектепте оқып жүр. Мұндағы температура күн сайын өлшеніп, тексеріледі. Сынып ішіндегі температура 20-22 градус жылы», — деп хабарлады Ақтөбе облыстық білім басқармасының баспасөз қызметі.

Қалаға қарасты ауыл жерлері Кентауға қосылады, деп хабарлайды ҚазАқпаратқа сілтеме жасаған Bastaumedia.kz ақпараттық порталы.

Кентау қаласы ауылдарының және елді мекендерінің шекараларын өзгерту және белгілеу туралы Кентау қаласы әкімінің қаулысы мен Кентау қалалық мәслихатының шешімі Ашық НҚА порталында жарияланды.

Құжатта, Қарнақ ауылының әкімшілік шекарасынан Кентау қаласының шекарасына 2655,53 гектар және Байылдыр ауылының шекарасына 264,75 гектар жер учаскелерін қосу арқылы Қарнақ ауылының шекарасы өзгертіліп, шекаралардың жалпы көлемі 35 257,16 гектар болып белгіленсін:

Хантағы ауылының шекарасынан Кентау қаласының шекарасына 22,67 гектар және Байылдыр ауылының шекарасына 728,45 гектар жер учаскелерін қосу арқылы Хантағы ауылының шекарасы өзгертіліп, шекаралардың жалпы шекарасын 44 718,61 гектар болып белгіленсін;

Қарнақ ауылының шекарасынан 264,75 гектар, Хантағы ауылының шекарасынан 728,45 гектар жер учаскелерін Байылдыр ауылының шекарасына қосу арқылы, Байылдыр ауылының шекарасынан 522,27 гектар жер учаскесін Кентау қаласының шекарасына алу арқылы Байылдыр ауылының шекарасы өзгертіліп, шекаралардың жалпы көлемі 24 819,43 гектар болып белгіленсін делінген құжатта.

Қоғамдық талқылауға ұсынылған құжат жобасы 25 ақпанға дейін талқыланады.

Жыл басынан бері Алматы облысында 9 мың гектар жер мемлекет меншігіне қайтарылады, деп хабарлайды ҚазАқпаратқа сілтеме жасаған Bastaumedia.kz ақпараттық порталы.

Алматы облысы жер қатынастары басқармасынан мәлім еткендей, былтыр облыс аумағында жалпы алаңы 89,7 мың гектар болатын 357 жер учаскесі мемлекет меншігіне қайтарылды.

2025 жылы мақсаты бойынша пайдаланылмайтын немесе жер заңнамасын бұза отырып берілген ауыл шаруашылығы мақсатындағы тағы 90 мың гектар жерді қайтару жоспарда.

«Осы жылдың басынан бастап қайтарылған жерлердің 559,0 гектарына типтік жалдау шарттарын жою туралы сот шешімдері шығарылды. Қалған 8 576,0 га жер учаскелерін иелері өз еркімен немесе басқа заңды процедуралар арқылы қайтарды», — деп хабарлады басқармадан.

Осыған дейін Алматы облысында 8 су қоймасы мемлекетке қайтарылғаны туралы жазған едік. Кейін мемлекет меншігіне өткен нысандарға жөндеу жұмыстары жүргізілетіні белгілі болды.

Жоспарда дамбаларды нығайту, су жіберу шлюздерін жөндеу, су қоймаларының жағдайын, әсіресе су тасқыны кезеңінде, бақылауды күшейту және нысандарды тұрақты мониторингтен өткізу бар.