BASTAUMEDIA

Премьер-министр Олжас Бектеновтің «Ілгерілеуге бастаған алты жыл: Қазақстан орнықты даму жолында» мақаласында 2019 жылдан бері энергетика саласында атқарылған іргелі істерді шолып өткен, деп хабарлайды ҚазАқпаратқа сілтеме жасаған Bastaumedia.kz ақпараттық порталы.

Олжас Бектеновтің пайымдауынша, коммуналдық шаруашылық және энергетика саласындағы дағдарыстың ең ауыр кезеңі артта қалды.

Президенттің басшылығымен еліміздің инфрақұрылымын ауқымды жаңғырту жұмыстары жүргізілуде.

Ұзақ жылдар бойы жылу энергетикасы секторына тиісті көңіл бөлінбей келді: республика бойынша инфрақұрылымдық желілердің тозу деңгейі 65%-ға, ал жекелеген өңірлерде тіпті 90%-ға жетті. Қазір энергетика және коммуналдық салалардағы дағдарыстың ауыр кезеңін еңсере алдық. Егер 2019 жылы жылу көздерінің орташа тозу деңгейі 71%-ға жетсе, қазір оны 61%-ға дейін төмендетуге мүмкіндік туды. Бұл жұмыс жалғасады, — деп жазады ол мақалада.

Үкімет басшысы былтыр Мемлекет басшысының тапсырмасымен 86 мың шақырым инженерлік желіні жаңғыртып, жаңа қуат көздерін іске қосуды көздейтін Ұлттық жоба іске асырыла бастағанын атап өткен. Үкімет бұл жоба ойдағыдай іске асса, технологиялық апаттар санын 20%-ға қысқартып, энергетикалық және коммуналдық секторлардың тозу деңгейін орта есеппен 40%-ға азайтуға, генерацияны 7 ГВт-тан астам арттыруға мүмкіндік береді. Аталған бағдарламаны іске асырған кезде қазақстандық өнім шығаратын кәсіпорындардың әлеуетін толық пайдалану жоспарланып отыр. Қазақстандық компаниялардың жоспарланған өнім көлемі шамамен 3,5 триллион теңге деп бағаланған.

«2019 жылдан бері электр энергиясын тұтыну 14%-ға өсіп, шамамен 120 миллиард кВт/сағ құрады. Халық санының өсуін, сондай-ақ жүргізіліп жатқан индустриялық даму және цифрландыру саясатын ескере отырып, энергия тұтыну одан әрі арта түседі деп болжанып отыр. Осыған орай Президент тапсырмасы бойынша ядролық энергетиканы дамыту қолға алынды. Бірінші АЭС құрылысының ауданы анықталды. Тағы екі станция салу үшін құрылыс орындарын анықтау жұмыстары басталды», — дейді Үкімет басшысы.

Астананың іргесіндегі Қосшы қаласында халықаралық деңгейдегі колледж ашылады. Ұлттық құрылтайдың V отырысында Үкіметке осындай тапсырма берілді, деп хабарлайды Ақорда.

«Ұлттық құрылтайдың отырыстарын әр облыста өткізудің ұтымды тұсы бар. Алқалы жиында аймақтың дамуына қатысты өзекті мәселелер де қаралады. Менің тапсырмаммен бүгінгі басқосуға Ақмола облысының бір топ азаматы қатысып отыр. Олардың ішінде ардагерлер, зиялы қауым өкілдері, қоғам белсенділері, кәсіпкерлер мен жастар бар.

Мен осы аймақтың дамуына айрықша мән беремін. Сондықтан Ақмола облысындағы кейбір бастамалар мен жобаларға назар аударғым келеді», — деген Мемлекет басшысы 2025 жыл «Жұмысшы мамандықтары жылы» деп жарияланғанын еске салды.

«Жастардың заман талабына сай білім алуын қамтамасыз ету үшін Үкімет пен облыс әкімдігі Қосшы қаласында халықаралық деңгейдегі колледж ашуға кірісуі қажет. Қаланың Астана іргесінде тұрғанын және тұрғындарының саны тез өсіп келе жатқанын ескерсек, бұл – өте өзекті мәселе», — деді Қасым-Жомарт Тоқаев.

Айта кетерлігі, құрылтайдың панельдік сессиялары кеше басталған. Ол секциялардың тақырыптары азаматтық қоғам, мәдениет, өнер, руханият, білім және ғылым, әлеуметтік-экономикалық даму мәселелерін қамтыды.

Мемлекет басшысы Қасым-Жомарт Тоқаев медицина инфрақұрылымын одан әрі ілгерілетуді тапсырды, деп хабарлайды Ақорда.

«Бүкіл ел бойынша медицина инфрақұрылымын барынша дамыту жұмыстары жалғасады. Жыл соңына дейін «Ауылда денсаулық сақтауды жаңғырту» ұлттық жобасы аясында 188 медицина нысаны салынады. Риддерде көп бейінді аурухананы, Өскеменде гематология орталығын, Ақтауда жедел жәрдем стансасын, Алматыда жұқпалы аурулар ұлттық ғылыми орталығын, Астанада ұлттық ғылыми онкология орталығының жаңа ғимаратын пайдалануға беру қажет», — деді Қасым-Жомарт Тоқаев Бурабайда өтіп жатқан ұлттық құрылтайда.
Осы орайда Президент 2026 жылы 32 аудандық орталық аурухананы жаңғыртуды тапсырды.

«Сондай-ақ Қызылорда және Маңғыстау облыстарындағы ауруханаларды салып бітіру керек. Жұмысты аяқтау мерзімін бұзуға болмайды», — деген міндет жүктеді Мемлекет басшысы.