BASTAUMEDIA

9 ақпанда Қазақстанның 13 облысында ауа райына байланысты дауылды ескерту жарияланды, — деп хабарлайды ҚазАқпаратқа сілтеме жасаған Bastaumedia.kz ақпараттық порталы.

Қазгидромет синоптиктерінің болжамы бойынша, Қызылорда облысының орталығында, шығысында көктайғақ, тұман болады. Қызылордада да кей уақыттарда көктайғақ, тұман болады деп болжанады.

Батыс Қазақстан облысының батысында, оңтүстігінде тұман түседі. Күндіз облыстың батысында, оңтүстігінде солтүстік-батыстан соққан желдің екпіні 15-20 м/с болады.

Күндіз Павлодар облысының орталығында, оңтүстігінде батыстан жел соғады, екпіні -15-20 м/с. Павлодарда да күндіз батыстан соққан желдің екпіні 15-20 м/с.

Түнде және таңертең Қарағанды облысының солтүстігінде тұман түседі.

Күндіз Абай облысының батысында, солтүстігінде, орталығында қар жауып, жаяу бұрқасын жүреді. Түнде және таңертең облыстың солтүстігінде, орталығында тұман болады. Облыстың оңтүстігінде, орталығында солтүстік-шығыстан оңтүстік-батысқа ойыса соққан желдің екпіні 15-20 м/с.

Түнде және таңертең Ұлытау облысының солтүстігінде солтүстік-шығыстан жел соғады, екпіні — 15-20 м/с.

Күндіз Шығыс Қазақстан облысының солтүстігінде, шығысында қар жауып, жаяу бұрқасын жүреді. Түнде және таңертең облыстың солтүстігінде, оңтүстігінде тұман түседі. Өскеменде де түнде және таңертең тұман болады.

Солтүстік Қазақстан облысының батысында, солтүстігінде, оңтүстігінде тұман түседі. Күндіз облыстың батысында көктайғақ болады, күндіз облыстың оңтүстік-шығысында батыстан, солтүстік-батыстан соққан желдің екпіні 15-20 м/с. Петропавлда да тұман түседі.

Ақтөбе облысының солтүстігінде, шығысында, орталығында жаяу бұрқасын жүреді, облыстың солтүстігінде, шығысында, орталығында солтүстік-шығыстан жел соғады, екпіні — 15-20 м/с, Мұғалжар ауданында соққан желдің екпіні 23 м/с дейін жетеді. Ақтөбеде солтүстік-шығыстан жел соғады, түндегі екпіні — 15 м/с.

Ақмола облысының солтүстігінде, шығысында, оңтүстігінде тұман түседі. Облыстың шығысында батыстан, солтүстік-батыстан жел соғады, екпіні — 15-18 м/с. Көкшетауда да тұман болады.

Жамбыл облысының оңтүстігінде, таулы аудандарында тұман түседі. Солтүстік-шығыстан жел соғады, облыстың солтүстік-шығысында, таулы аудандарында соққан желдің екпіні 15-20 м/с, түнде екпіні 23 м/с дейін жетеді. Таразда кей уақыттарда тұман түседі.

Қостанай облысының оңтүстігінде жаяу бұрқасын жүреді. Облыстың солтүстігінде, шығысында тұман түседі. Облыстың оңтүстігінде солтүстік-батыстан соққан желдің екпіні 15-20 м/с. Қостанайда тұман болады.

Жетісу облысының солтүстік-шығысында, Алакөл көлдері ауданында шығыстан соққан желдің екпіні 15-20 м/с болады. Түнде және таңертең шығыста, облыстың таулы аудандарында тұман болады.

Ауа райына байланысты екі облыста көлік қозғалысы шектелген болатын.

Астанада халық санының көбеюіне байланысты әлеуметтік нысандарға деген сұраныс пен қажеттілік артып келеді. Бұл мәселені шешу мақсатында мемлекеттік бюджет пен жеке инвестиция есебінен мектеп, балабақша мен медициналық ұйымдар сияқты қала тұрғындары үшін аса маңызды нысандардың құрылысы үздіксіз жүргізіліп жатыр, деп хабарлайды елорда әкімдігінің ресми сайтына сілтеме жасаған Bastaumedia.kz ақпараттық порталы.

Мәселен өткен жылы елордада 24 мектеп ашылса, биыл тағы бірнеше білім ордасын пайдалануға беру жоспарланған. Астана қаласы Білім басқармасының басшысы Қасымхан Сенғазиев алдағы уақытта қай ауданда және қанша жаңа нысанның ашылатыны жайлы толығырақ айтып берді.

Былтыр елімізде пайдалануға берілген оқушы орны рекордтық көрсеткішке жетті. Салынған мектептердің саны жағынан елорда алдыңғы қатарда. Өткен жылы Астанада бір ауысымда 33 мыңдай оқушыға арналған 24 мектеп ашылды. Оның көбісі «Жайлы мектеп» ұлттық жобасы аясында бой көтерген. Аталған жоба бойынша салынған мектептер жаңа оқу жылында 22 400 елордалық оқушыны қабылдады.

Астана қаласы Білім басқармасының басшысы Қасымхан Сенғазиевтің айтуынша, «Жайлы мектептердің» жетеуі Есіл ауданында, төртеуі Нұра ауданында, үшеуі Алматы ауданында, ал қалған екеуі Сарыарқа ауданында орналасқан. Сонымен қатар бюджеттік инвестициялық жоба бойынша 1 550 орындық 3 мектеп, 3 240 орындық 5 жекеменшік мектеп пайдалануға берілді.

Бұл елордадағы үш ауысымды, оқушы саны шамадан артық және апатты мектептердің мәселесін шешуге мүмкіндік береді.

Өз кезегінде Қасымхан Сенғазиев елордалық оқушылардың сапалы білім алуы үшін мектеп салу жұмыстары биыл да жалғасатынын жеткізді. 2025 жылы бір ауысымда 23 мың оқушы сабақ оқи алатын 15 мектеп ашылады. Оның ішінде төртеуі бюджеттік инвестициялық жоба бойынша салынып, 2 700 оқушыны қабылдайтын болады. Аталған 4 мектептің екеуі Нұра ауданында, қалғаны Алматы ауданында орналасады.

«Жайлы мектеп» жобасы аясында мектеп салу биыл да жалғасады.

«2025 жылы жалпы сыйымдылығы 22 912 орындық 15 мектепті пайдалануға беру жоспарланып отыр. Оның ішінде, «Жайлы мектеп» ұлттық жобасы аясында жалпы саны 14 мың оқушыға арналған 7 білім ордасы ашылады. 4 мектеп Нұра ауданында, 2 мектеп Алматы ауданында, 1 мектеп Байқоңыр ауданында орналасады. Елордадағы жекеменшік мектептер саны да арта түседі. Жеке инвестордың қаржысы есебінен салынатын 4 мектеп жаңа оқу жылында шәкірт қабылдайды. Осылайша бұл мектептерде 6 мыңнан астам оқушы білім алатын болады. 5172 оқушыға арналған 3 мектеп Есіл ауданында, 1040 оқушыға арналған 1 мектеп Нұра ауданында орналасады», — деді Қасымхан Сенғазиев.